Department of Traditional Medicine

၂၀၁၇ ခုနှစ် နိုဝင်ဘာလ ၂၀ ရက်နေ့တွင် ညနေပိုင်းတွင် ကျန်းမာရေးနှင့်အားကစား ဝန်ကြီးဌာန၊ တိုင်းရင်းဆေးပညာဦးစီးဌာနက အစည်းအဝေးသို့ တက်ရောက်လာကြသည့်  မဲခေါင်ဒေသတွင်းနိုင်ငံများမှ ရိုးရာတိုင်းရင်းဆေးပညာရှင် ကိုယ်စားလှယ်များနှင့် ဖိတ်ကြား ထားသော တိုင်းရင်းဆေးဝါးထုတ်လုပ်ရေးလုပ်ငန်းရှင်များ၊ နှီးနွယ်ဝန်ကြီးဌာနမှ ကိုယ်စားလှယ်များနှင့် သုတေသီများအား ကရဝိတ်နန်းတော် ဟိုတယ်၌ ညနေစာဖြင့် တည်ခင်းဧည့်ခံခဲ့ပါသည်။

အဆိုပါ ညစာစားပွဲ အခမ်းအနားသို့ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းနှင့် ရန်ကုန်မြို့တော်စည်ပင်သာယာရေးကော်မတီ ဥက္ကဋ္ဌ၊ ရန်ကုန်တိုင်းဒေသကြီး မြို့တော်ဝန်တို့မှ တက်ရောက်ချီးမြှင့်ပါသည်။

ဆက်လက်ပြီး (၈)ကြိမ်မြောက် မဲခေါင်ဒေသတွင်းနိုင်ငံများ၏ တိုင်းရင်းဆေးပညာ ရပ်ဆိုင်ရာ အစည်းအဝေး ဒုတိယနေ့ကို နိုဝင်ဘာလ ၂၁ ရက်နေ့တွင် ဆန်းမစ်ပတ်ဗျူးဟိုတယ်၌ ဆက်လက် ကျင်းပရာ ကမ္ဘောဒီးယား၊ တရုတ်၊ လာအို၊ မြန်မာ၊ ထိုင်းနှင့် ဗီယမ်နမ်နိုင်ငံတို့မှ ရိုးရာတိုင်းရင်းဆေး ပညာရှင်ကိုယ်စားလှယ်များက ရိုးရာတိုင်းရင်းဆေးကုထုံးများကို လက်တွေ့ပြသကြပါသည်။

မဲခေါင်ဒေသတွင်းနိုင်ငံများဆိုင်ရာ တိုင်းရင်းဆေးပညာရပ်ဆိုင်ရာအစည်းအဝေးနှင့် ရိုးရာ ကုထုံးပြသပွဲကို ၂၀၁၇ ခုနှစ်စ၍ တရုတ်နိုင်ငံနှင့် ထိုင်းနိုင်ငံတို့တွင် နှစ်နှစ်လျှင်တစ်ကြိမ် တစ်လှည့်စီကျင်းပခဲ့ပြီး (၈)ကြိမ်မြောက် အစည်းအဝေးကို မြန်မာနိုင်ငံကအိမ်ရှင်နိုင်ငံအဖြစ် ပထမဆုံးအကြိမ် ကျင်းပခြင်းဖြစ်ကာ  မဲခေါင်ဒေသတွင်းနိုင်ငံများမှ တိုင်းရင်းဆေးဆရာများ၊ ရိုးရာ တိုင်းရင်းဆေးကုပညာရှင်များနှင့် သုတေသီများ တက်ရောက်ဆွေးနွေးခဲ့ကြပါသည်။