Department of Traditional Medicine

နေပြည်တော်၊ စက်တင်ဘာ (၂၄)ရက်

ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီးဒေါက်တာမြင့်ထွေးသည် ယနေ့နေ့လည်ပိုင်းအချိန်တွင် တိုင်းရင်းဆေးပညာဦးစီးဌာန၊ ရုံးအမှတ်(၄၇)တွင်၊ နေပြည်တော်၌ ကျန်းမာရေးနှင့် အားကစားဝန်ကြီးဌာနတွင် ဦးစီးအရာရှိရာထူးဖြင့် အလုပ်တာဝန်စတင် ထမ်းဆောင်မည့် ဦးစီးအရာရှိ (စီမံ/ဘဏ္ဍာ) (၁၃)ဦးနှင့် ဦးစီးအရာရှိ(ကွန်ပျူတာ)(၁၄)ဦးတို့ကို လက်ခံတွေ့ဆုံ၍ လမ်းညွှန်အမှာစကား ပြောကြားခဲ့ပါသည်။

ထိုသို့တွေ့ဆုံရာတွင် ပြည်ထောင်စုဝန်ကြီးက-

• ကျန်းမာရေးနှင့်အားကစားဝန်ကြီးဌာနတွင် ဦးစီးအရာရှိရာထူးဖြင့် အလုပ်တာဝန် စတင်ထမ်းဆောင်မည့် ဝန်ထမ်းများကို ကြိုဆိုပါကြောင်း၊
• ဝန်ကြီးဌာနသည် ယခု (၂၀၁၈) ခုနှစ်ကို သတင်းအချက်အလက်နှစ် (Year of data and information)၊ ဘဏ္ဍာငွေများ အလေအလွင့်မရှိစေရန် ကျိုးကြောင်းဆီလျော်စွာ အသုံးပြုရေးနှစ် (Year of rational allocation of budget)အဖြစ် သတ်မှတ်၍ လုပ်ငန်းများဆောင်ရွက်လျက်ရှိသဖြင့် ယခုတာဝန်ထမ်းဆောင်မည့် ဦးစီးအရာရှိများသည် ဝန်ကြီးဌာန၏ လုပ်ငန်းများကို များစွာအထောက် အကူပြုနိုင်မည်ဖြစ်ကြောင်း၊
• မိမိသက်ဆိုင်ရာကဏ္ဍတွင် ဝန်ကြီးဌာနမှ ဆောင်ရွက်လျက်ရှိသော လုပ်ငန်းများကို သိရှိ နားလည်စေရေး ကြိုးစားဆောင်ရွက်ကြစေလိုကြောင်း၊
• အခက်အခဲများရှိပါကလည်း သက်ဆိုင်ရာဦးစီးဌာနမှ တာဝန်ရှိသူများထံ ပွင့်လင်းစွာ အသိပေးစေပြစေလိုကြောင်း ပြောကြားခဲ့ပါသည်။

အဆိုပါတွေ့ဆုံပွဲသို့ ကျန်းမာရေးနှင့်အားကစားဝန်ကြီးဌာန၊ အမြဲတမ်းအတွင်းဝန် ပါမောက္ခဒေါက်တာသက်ခိုင်ဝင်း၊ အစားအသောက်နှင့်ဆေးဝါးကွပ်ကဲရေးဦးစီးဌာန ညွှန်ကြားရေးမှူးချုပ် ပါမောက္ခဒေါက်တာခင်ဇော်၊ တိုင်းရင်းဆေးပညာဦးစီးဌာန ခေတ္တညွှန်ကြားရေးမှူးချုပ် ဦးကျော်သိန်းဌေး၊ ကျန်းမာရေးနှင့်အားကစားဝန်ကြီးဌာန၊ ဒုတိယအမြဲတမ်းအတွင်းဝန် ဦးစိန်ဝင်း၊ ကုသရေးဦးစီးဌာန ဒုတိယညွှန်ကြားရေးမှူးချုပ် ဒေါက်တာသီတာလှ၊ ပြည်သူ့ကျန်းမာရေးဦးစီးဌာန  ဒုတိယညွှန်ကြာရေးမှူးချုပ် ဒေါက်တာသောင်းလှိုင်၊ စီမံ/ဘဏ္ဍာဌာနခွဲမှ ဒုတိယညွှန်ကြာရေးမှူးချုပ် ဒေါ်အေးအေးစိန်၊ ကျန်းမာရေး သတင်းအချက်အလက်ဦးစီးဌာနမှ ဒုတိယညွှန်ကြားရေးမှူးချုပ် ဒေါက်တာသက်သက်မူ၊ ဝယ်ယူဖြန့်ဖြူးရေးဌာနမှ ဒုတိယညွှန်ကြားရေးမှူးချုပ် ဒေါက်တာဝင်းနိုင်နှင့် တိုင်းရင်းဆေးပညာဦးစီးဌာနမှ တာဝန်ရှိသူများ တက်ရောက်ခဲ့ပါသည်။