Department of Traditional Medicine

           * နေနေနိုင်ရည်၊ မိုးမိုးသန်း(တိုင်းရင်းဆေးပညာဦးစီးဌာန)

မြန်မာ့တိုင်းရင်းဆေးသမားတော်များညီလာခံကို(၂၀၀၀)ပြည့်နှစ်ကစတင်ပြီး နိုင်ငံတော် အဆင့် နှစ်စဉ်မပျက် အောင်မြင်စွာကျင်းပလာခဲ့သည်မှာ ယခုဆိုလျှင်(၂၄)ကြိမ်မြောက်ကျင်းပနိုင်တော့မည် ဖြစ်ပါသည်။ ယခုကဲ့သို့ အောင်မြင်စွာကျင်းပနိုင်ခြင်းသည် နိုင်ငံတော်အစိုးရ၏ အားပေးချီးမြောက်မှု နှင့်အတူ တိုင်းရင်းဆေးသမားတော်ကြီးများအားလုံး၏ စည်းလုံးညီညွတ်စွာပူးပေါင်းပါဝင်ဆောင်ရွက် မှုများကြောင့်လည်းဖြစ်ပါသည်။ ယခုအခါပြည်သူလူထု၏ ကျန်းမာရေးကို တိုင်းရင်းဆေးပညာဖြင့် အထောက်အကူပြုနိုင်ရန်အလွှာစုံမှ ပညာရှင်များပါဝင်သော (၂၄)ကြိမ်မြောက်မြန်မာ့တိုင်းရင်းဆေး သမားတော်များညီလာခံနှင့် မြန်မာ့တိုင်းရင်းဆေးပညာနှီးနှောဖလှယ်ပွဲကို ၂၀၂၅ ခုနှစ်၊ ဒီဇင်ဘာလ (၁၅)ရက်နေ့မှ(၁၇)ရက်နေ့အထိ မြန်မာအပြည်ပြည်ဆိုင်ရာကွန်ဗင်းရှင်းဗဟိုဌာန(၁)တွင် ကျင်းပသွား မည်ဖြစ်ပါသည်။ ထိုကဲ့သို့ မြန်မာ့တိုင်းရင်းဆေးသမားတော်များညီလာခံကျင်းပရာတွင် တိုင်းရင်းဆေး သမားတော်များသာမက နှီးနွယ်ပညာရှင်များပါ ပါဝင်ပြီးအတွေ့အကြုံ၊အတွေးအမြင်များကိုဖလှယ်ကြ ခြင်းဖြင့် မြန်မာ့တိုင်းရင်းဆေးပညာ အဆင့်အတန်းပိုမိုမြင့်မားစေရန် အထောက်အကူကောင်းများ လည်းရရှိနိုင်ကြမှာဖြစ်ပါသည်။ ယနေ့ခေတ်ကာလသည် မြန်မာ့တိုင်းရင်းဆေးပညာကို နိုင်ငံတော် အစိုးရ၏ ပံ့ပိုးမှုနှင့်အတူ တိုင်းရင်းဆေးသမားတော်ကြီးများ၏ ဂိုဏ်းဂဏစိတ်ထားကင်းရှင်းစွာ တိုင်းရင်းဆေးပညာ အကျိုးရှေးရှုကြိုးပမ်းဆောင်ရွက်မှုနှင့် ပြည်သူများ၏ မြန်မာ့တိုင်းရင်းဆေးအပေါ် ယုံကြည်ကိုးစားအားပေးမှုတို့ အပြန်အလှန်ပေါင်းစည်းအကျိုးပြုလျှက် မြန်မာ့တိုင်းရင်းဆေးပညာ ထွန်းတောက်အောင်အားသွန်ခွန်စိုက်ကြိုးပမ်းသွားနိုင်မည့် အခြေအနေကောင်းများရှိနေပြီဖြစ်ပါသည်။