Department of Traditional Medicine

တိုင်းရင်းဆေးပညာဦးစီးဌာန၊ ဗဟိုတိုင်းရင်းဆေးဝါးကြီးကြပ်ရေးကော်မတီ (၁/၂၀၂၁)အစည်းအဝေးကို ယနေ့(၇-၆-၂၀၂၁)ရက်နေ့ နေ့လယ်ပိုင်းက တိုင်းရင်းဆေးပညာဦးစီးဌာန အစည်းအဝေးခန်းမ၊ ရုံးအမှတ်(၄၇)တွင် ကျင်းပပြုလုပ်ခဲ့ရာ ကျန်းမာရေးနှင့်အားကစားဝန်ကြီးဌာန၊ ပြည်ထောင်စုဝန်ကြီးဒေါက်တာသက်ခိုင်ဝင်းတက်ရောက်ခဲ့ပါသည်။

အစည်းအဝေးတွင် ပြည်ထောင်စုဝန်ကြီးက ပြောကြားရာတွင် -

• တိုင်းရင်းဆေးပညာဦးစီးဌာန လုပ်ငန်းများပုံမှန်ဆောင်ရွက်နိုင်ရေး လိုအပ်သည်များ ကူညီ ဖြည့်ဆည်းပေးမည်ဖြစ်ပါကြောင်း၊
• တိုင်းရင်းဆေးပညာဦးစီးဌာနအနေဖြင့် နှစ်စဉ်ကျင်းပမြဲဖြစ်သော မြန်မာ့တိုင်းရင်းဆေးသမား တော်များညီလာခံနှင့် သုတေသနစာတမ်းဖတ်ပွဲများတွင် ဆွေးနွေးတွေ့ရှိချက်များနှင့်ပတ်သက်၍ ဆောင်ရွက်ပြီးစီးမှုများအား ပြန်လည်ဆန်းစစ်၍ လုပ်ငန်းများ ဆက်လက် ဆောင်ရွက်ရမည် ဖြစ်ပါကြောင်း၊
• ဝန်ထမ်းများ အဆင်ပြေချောမွေ့စွာ တာဝန်ထမ်းဆောင်နိုင်ရေးနှင့် ရာထူးတိုးမြှင့်ရေးကိစ္စရပ်များ၊ နိုင်ငံခြားပညာတော်သင်များ စေလွှတ်ပေးမှုများအား လုပ်ထုံးလုပ်နည်းများနှင့်အညီ ဆောင်ရွက်ပေးလျက်ရှိပါကြောင်း၊
• တိုင်းရင်းဆေးတက္ကသိုလ်ရှိ ပြတိုက်မှ ပေ၊ ပရပိုက်များ၊ ဆေးကျမ်းများနှင့် တိုင်းရင်းဆေး ပရဆေးဉယျာဉ်အား မပျက်စီးစေရန် ယခုထက်ပိုမို၍ စနစ်တကျ ထိန်းသိမ်းစောင့်ရှောက်ရန်၊  လိုအပ်ပါကြောင်း၊
• တိုင်းရင်းဆေးဝါးထုတ်လုပ်ရေးလုပ်ငန်းများ ဖွံ့ဖြိုးတိုးတက်စေရေးအတွက် တိုင်းရင်းဆေးဝါး မှတ်ပုံတင်ခြင်းလုပ်ငန်းကို လျင်မြန်အဆင်ပြေ‌စေရန်ဆောင်ရွက်ပေးလျက်ရှိပြီး စည်းကမ်းချက်များနှင့်အညီလိုက်နာဆောင်ရွက်နိုင်ရန်ကြီးကြပ်သွားရမည်ဖြစ်ပါကြောင်း၊
• တိုင်းရင်းဆေးဝါးများ၏ အာနိသင်ထိရောက်မှု (Efficacy) နှင့် လုံခြုံစိတ်ချရမှု (Safety) ဆိုင်ရာ သုတေသနများ စနစ်တကျ တိုးမြှင့်ဆောင်ရွက်ရန်ဖြစ်ပါကြောင်း ပြောကြားခဲ့ပါသည်။

ထို့နောက် အစည်းအဝေးသို့ တက်ရောက်လာသူ တိုင်းရင်းဆေးဆရာကြီးများနှင့် ဗဟိုတိုင်းရင်းဆေးဝါးကြီးကြပ်ရေးကော်မတီဝင်များမှ လိုအပ်ချက်များကို အသီးသီးတင်ပြခဲ့ရာ ပြည်ထောင်စုဝန်ကြီးနှင့် အစည်းအဝေးသို့တက်ရောက်လာသည့် တာဝန်ရှိသူများမှ ပြန်လည် ဆွေးနွေးညှိနှိုင်းပေးခဲ့ပါသည်။ အစည်းအဝေးသို့ ဗဟိုတိုင်းရင်းဆေးဝါး ကြီးကြပ်ရေးကော်မတီဝင် (၂၇)ဦး နှင့် တာဝန်ရှိသူများ တက်ရောက်ခဲ့ကြပါသည်။

ဆက်လက်၍ ပြည်ထောင်စုဝန်ကြီးသည် ဒုတိယဝန်ကြီး ဒေါက်တာအေးထွန်းနှင့် တာဝန်ရှိသူ များလိုက်ပါလျက် တိုင်းရင်းဆေးပညာဦးစီးဌာန၊ သုတေသနနှင့်ဖွံ့ဖြိုးရေးဌာနခွဲ၊ သုတေသနဌာန စိတ်ရှိ အရည်အသွေးထိန်းချုပ်ရေးဓါတ်ခွဲခန်းတွင် ထိန်းသိမ်းထားရှိသောတိုင်းရေးဆေးဝါးနမူနာများ၊ ကုန်ကြမ်းများနှင့် ဓာတ်ခွဲစမ်းသပ်စစ်ဆေးခြင်း လုပ်ငန်းများဆောင်ရွက်နေမှုကို လှည့်လည်ကြည့်ရှု စစ်ဆေးခဲ့ရာ တာဝန်ရှိသူများမှ အသေးစိတ်ရှင်းလင်း တင်ပြခဲ့ပြီး ပြည်ထောင်စုဝန်ကြီးက ဆက်လက်ဆောင်ရွက်ရမည့်လုပ်ငန်းများနှင့်ပတ်သက်၍ လမ်းညွှန်မှုများ ပေးအပ်ခဲ့ပါသည်။